Mat 1 | GAM | STEP | Buk ge Jisas Krais gollye moi mal kandjine. Jisas moi ge gollye Depit moi. Alla Depit gollye ge Abraam moi.

Matthew 1

Jisas Krais gollye moi mal kandjine

(Luk 3.23-38)

1 Buk ge Jisas Krais gollye moi mal kandjine. Jisas moi ge gollye Depit moi. Alla Depit gollye ge Abraam moi. 2 Abraam wariye ge Aisak moi. Aisak wariye ge Jekop moi. Jekop wariye ge Juda ne, age kambono moi. 3 Juda wariye ge Peres ne, Sera soka mopill. Soka mane ge Tamar moi. Peres wariye ge Esron moi. Esron wariye ge Ram moi. 4 Ram wariye ge Aminadap moi. Aminadap wariye ge Nason moi. Nason wariye ge Salmon moi. 5 Salmon wariye ge Boas moi. Boas megama ge Raap moi. Boas wariye ge Obet moi. Obet megama ge Rut moi. Obet wariye ge Jesi moi. 6 Jesi wariye ge King Depit moi.

Depit wariye ge Solomon moi. Solomon megama moi ge asamoll woge Uria moi. 7 Solomon wariye ge Reoboam moi. Reoboam wariye ge Abia moi. Abia wariye ge Asa moi. 8 Asa wariye ge Jeosapat moi. Jeosapat wariye ge Jeoram moi. Jeoram wariye ge Usia moi. 9 Usia wariye ge Jotam moi. Jotam wariye ge Aas moi. Aas wariye ge Esekia moi. 10 Esekia wariye ge Manase moi. Manase wariye ge Emon moi. Emon wariye ge Josaia moi. 11 Josaia wariye ge Jeoiakin ne, age kambono moi. Kune ge dumo Babilon una wo kunda bolo Israel una to ipo Babilon wormaka kaye pa moi.

12 Babilon kaye pa molmaka Jeoiakin wariye ge Sealtiel moi. Sealtiel wariye ge Serubabel moi. 13 Serubabel wariye ge Abiut moi. Abiut wariye ge Eliakim moi. Eliakim wariye ge Asor moi. 14 Asor wariye ge Sadok moi. Sadok wariye ge Akim moi. Akim wariye ge Eliut moi. 15 Eliut wariye ge Eleasar moi. Eleasar wariye ge Matan moi. Matan wariye ge Jekop moi. 16 Jekop wariye ge Josep moi. Josep game gama ge Maria moi. Maria Jisas kui, kandjiye dji ge Krais ^{▼▼Krais — Kamasa, God Juda una moi al embe dji, ye God moro ge, na moyo. Alla ye na unakna moyeke embe yembon we dji. (Kisim Bek 6.7) Dji mal ge Olpela Testamen kandja embe mal dji, iwa Krais ta wo ye Juda una amblo pille dje aunda. Una wo ye Juda una kamblo kal woro ye kantau moye. Ye wandill mal moye ba, iwa Krais ge, une wo kunda bolo ye kunda yem una to wordaka, ye Juda una wopake moye. Jisas moi kune ge, una Juda una iwa Krais ta wo kunda bolo yembe ye embe yenda dje pille tau ye moi. Alla Jisas woi ge, Juda una pende embe dji, God iwa Krais ta dje worda wonda we dji ge, Jisas wale moro. Ba Juda una pende man we dji. Jisas ge kende kulo yendo. Krais ta wonda we dje God embe dji ge, Jisas wale namoro we dji. Alla Juda una ipon mor ge, ga Krais ta wonda dje pille tau ye pa mor. Jisas woi ge, Juda una man we djinj. Ye Kristen una mor ge Jisas ge ye iwa Krais moro; no Juda una mormon ge une no iwa Krais namoro we djinj.} we dji.

17 Embe pai pille, Abraam asa molo po goi kune ge, alla po Depit moi kune ge, gollye 14-pela molo golo pi. Depit molo po goi kune ge, po kambono Israel er dumo Babilon po kaye pai kune ge, gollye 14-pela kambono molo golo pi. Er Babilon po kaye pa pumaka, iwa Krais moi kune ge, alla gollye 14-pela molo golo pi.

Ana Maria womba Jisas kui

(Luk 2:1-7)

18 Jisas Krais moi mal kandjiyembe ge embe mal paro. Jisas me Maria moi ge una embe dji, ni Josep boll bolo imbell we djimaka, soka ou aike napapill ba, una kani Maria womba mogi. Mogi ge God Murble wo djika Maria womba kumbe al moi. 19 Maria woge Josep moi ge une iwa wopake moi. Maria womba kumbe al moi ge Josep una kane djineke, Maria ngandjill golo djinda dje, une kiye dje kerno dje pi. 20 Josep nomane al embe mal paika une imina ou pai al oukumb kani. Iwa Kerman tau agelo ta dje worika wo embe dji, Josep, ni Depit unakiye moren, ni Maria boll bolo imboll dje yenmell ge kand nagopen. Une womba mogro ge God Murble dji pille une moglo moro. 21 Ana Maria womba kuya ge, yake pla po, God unakiye i yem woro, yenekne singare ke ye wanne ge une kere aunda. Ge pille, ni womba kandjiye yemben ge Jisas we djimben we dji.

22 Maria womba mogi ge, asa Iwa Kerman ye worika, propet kandja dji mal ge megiye toi. Propet pepa bolo embe dji, 23 ye pillme! dji. Ambo ta iwa boll aike napapill ba, womba moglo wariye kuya. Kandjiye Emanuel we djine we dji. Ge me embe mal paro, God nono boll moro.

24 Josep ou pai ge kere po Iwa Kerman yene tau agelo kandja dji mal pille, Maria boll bolo ipill. 25 Soka ou aike pa nawane pupillka, wariye kui. Josep womba kandjiye yei ge Jisas we dji.